تونس العزيزة الغالية

بلادي مأوى، 

فلوكة مقلوبة في شط أوت،

ظل يعاونك ويحبّك،

لحظة غفلة مسروقة للحضبة.

مدينتي فردوْس،

واحة خضراء في الصحراء،

مطرة غزيرة في الشياح،

إبتسامة على شفايف مارّة.

أنهجتها عامرة...

تشم فيها روايح الفاحات والبخور

والعمبر والقرفة والكليل.

أنهجتها غزات تونس،

حيوط بيضة وبيبان زرق،

شبابك مزيْنة بالحديد.

الزناقي حبست الوقت.

مدينتي كبيرة وشبابة.

ثرْوتها مئة ألف حومة،

زوز بحيْرات، جزيرة والبشروش.

جات بين البر والبحر...

مدينتي ليها ألاف السنين :

أمازغية، فينيقية، رومانية،

عربية، تركية، فرنسية.

أنهجتها توفى بحذاء بير

كانت العلجيّة تجبد منّو الماء

تحلم وتتذكّر بلادها الأولى.

الحارة تغلي بالناس، راهو شبّات !

العزايز بين اليهود لبسوا لبستهم

وماشين للسيناڨوڨ،

يقراوْا فيها سفر التوْراة.

وقت الأذان،

المسلمين جايين من كل شيرة.

الكراهب واقفة والكياسات مليانة.

كانك ع السبابط، حتّى هيّ خاشعة.

الشبابك محلولة

ونسمة الصباح تتسرسب في الديار.

البنات تلعب بالماء وتتضاحك

وإلاّ تمشط شعرها وتفدلك.

صوت أم كلثوم في الراديون.

أول الصيف تبدا العروسات

الفرق تعزف في السالات

والبنات جنّيات 

برقصة تسحر لك بني آدم

يا صغير يا كبير...

العروس والعروسة مصدرين

والناس تخزر لبعضها

تكيّل في بعضها

هايْ الصيغة ! هايْ الروبة !

والرجال بسرقة

هبطوا كويّس

وإلاّ دبّيبزة وسكي

والحفلة للصباح يا بمبك !

عدّيت صغري على أغصان توتة

نتأمّل في هدوء نهج القرنفل

ونتشعبط على سقف كوخ الجيران

والاّ راكش على كرسي النجّار.

الزويْ خلات والطلاب في الشوارع.

فروخ مكلفرطين في الباساج،

قحاب في النصر والمنار.

البلْدية هجّوا ليهم مديدة.

نعشقك يا مدينتي

نعشقك ونكرهك...

نبكي على أسوارك المهدومة

نبكي على كرامتك المنهوبة

تعدّاوْا عليك يا صبية !

ما نحملش ها الكذابة والقلابة !

صعيب عليّ فراقك

آما فراقك لازم...

هزّيتني وآنا صغير وشاب

حمّلتني وحنّيت عليّ

خنتك آما عشقتك

يا مرأة إنتي الوحيدة من جنسك

اللي نجّمت تفهمني.

يا بلادي،

إنتي أرض الشعراء !

إنتي الطين اللي تخرجوا

منّو الدوعاجي والشابي

والمسعدي والفارسي.

طين أسمر وأحمر،

صعيب كي قبضتك.

ضوء مستزرق

يطمئنّي ويخفّف من حالي.

يا مدينتي، إنتي الأنثى والذكر!

الليل في حلق الواد،

الأشباح تتسكّع في الشوارع.

صقلّيين ويهود

عاشوا في زمان آخر...

روايح الحوت المشوي

وكيسان الشراب

شهّات حتّى المحافظين.

راجل سمين حاطت مشموم فوق وذنو

قرب من طاولتنا...

صاح بصوت مراوي :

ـــ مشموم ؟

ـــ بقدّاش ؟

ـــ باهي، هات واحد...

من بعد،

عركة قدّام المطعم

الشارع تعبّا بالناس

وحس ضربة

بن آدم ممدود ع الكياس

داخ آما فيسع ما قام.

في سيدي بو سعيد

بلايص الباركينق بالمقابل

مشينا لسيدي شبعان

تاي بالنعناع

وشيشة قدّام الخليج

البوقرنين الخلاّب

والوطن القبلي

ركعوا الزوز لمكّة.

من رأس طابية في الصباح

تونس تحلّق في السماء،

سارحة في السحاب...

البلاد السوري من الوطاء

شارف عليها الجلاّز

ومن الفوق جبال الأطلس 

مسافرة للمرّوك.

في ضفاف البحيْرة ــــ مستنقع قديم ــــ،

عايلات ساهرة مع المعسل بالتفّاح...

أولادهم يتزحلقوا بالرولار...

أوّل محاولة لشاب وشابة :

يد تسرسبت والأخرى وافقت...

طيور البلاستيك تتناطح في البطحاء

والآربوس هاجم عليهم.

وسط الجمعة في باب سويقة،

الساحة حاشدة

والسرتي بالتولكي ـــ والكي،

الرجال تكحّل قدّام البيلوت،

والنفق يبلع الكراهب والموتورات.

عشيّة دربي في العاصمة

الدرابوات فوق الكراهب

والكراهب تجري وتزمّر

كل بونتو سبب ممكن

لثوْرة في القهوة.

في نهج الدبّاغين

ورّقت كتاب ساليينيتسينيا

سومو تلاثة سوردي...

في نهج زرقون،

حانوت الكاسيتات

رؤول جورنو وحبيبة مسيكة...

شريت ملاوي

في ساحة حبيب ثامر...

وجات الكار، زينة وعزيزة... 

ياخي من وراء الشباك المسّخ،

خزرت لزين تونس يضمحل قدّام عينيّا...

ليلة سبت في الآكروبوليوم،

الأكتوبر الموسيقي لقرطاج، 

فرقة ألمانيّة تعزف الباروك.

ناس ذوّاقة :

شباب، بورجوازيين، أوروباوين...

تعدّيت على نهج القصبة،

النصبات ملوْنة والناس هايْجة...

دزني وندزّك ! قابلني عتّال هازز سلعة

رخّيت، هزّيت روحي وخرجت...

باب بحر ! كان ندور ع اليسار ؟

فيْقتني صيحة ع اليمين :

عنابة ! عنابة ! ماشي لعنابة ؟

كريم عبد الكريم