متمرّد من غير سبب

الإسهال اللفظي ظاهرة منتشرة عند برشة ناس على فايسبوك... البعض موهوبين وانّجّم نذكر على سبيل المثال صديقي الدكتور فهمي البلطي... كيف ما قال وزير الصحّة السابق محمّد صالح بن عمّار : "ما أكبر دين أمها بلطة... ولاّتشي ولاية...؟" فهمي البلطي إنسان (في ما يبدو والله أعلم...) ذو القلب النحيف، شاعر متمرّد من غير سبب والاّ ناقم على كل شيء... أوّلها ربّي... قيل أنّو ربّي مات... فريدريش نيتشه قال : "ربّي مات ! ربّي مات ! نحنا اللي قتلناه ! كيفاش نواسيوْ بعضنا نحنا مجرمين المجرمين." البروتستانتيون الانجيليون جاوبوه : "ربّي بُعِث من الموت.... ربّي حيْ !" جون أوسبورن تساءلت : "كان جاء ربّي واحد منّا... جبري كيفنا... برّاني طلع في الكار ويحب يروّح ل دارو ؟" وأخينوعم نيني ختمت : "كل يوم يمر، يدل على أنّو ربّي ضيّع مراياتو والاّ بالكشي الدموع ضبّبتلو عينيه ؟"

فهمي البلطي متمرّد كيف جامس دين في الفيلم "طيش الشباب"... متمرّد لمبدأ التمرد... يفيق متمرّد، يتكيّف متمرّد، يبول متمرّد، يرقد متمرّد... التمرّد ولّى نوْع من الشعر والموقف المستمر... فن، طموح، غاية، نبل... فهمي أرستوقراطي متاع التمرّد... حامل لمفجرات فكرية متمردة هيّ زادا... متمردة ع الحياة، ع الواقع، ع المجتمع، ع العايلة، ع النظام الأبوي، إلخ. فهمي كيف سيزيف، كل نهار يهز صخرة باش تعاود تطيح ويعاود هو يهزها إلى الأبد... كيف خنافس الروث زادا... فهمي البلطي فنّان في هدم الأيقونات، وأوّلها إيقنتو الذاتية... كائنو، جسمو، روحو، نفسو، قلبو، كلاويه، عدساتو، مثانتو، طحالو، إلخ... فهمي واثق أنّو ما هوش واثق...

فهمي البلطي مخلوق جاي من كوْكب آخر، من زحل والاّ عطارد... من مجرة أخرى... جنّي وملاك... هبط علينا ما يعرفش علاش... يكتب ما يعرفش علاش... يحب ما يعرفش علاش... حامي للأرملة واليتامة... أناني وغيري في نفس الوقت... راجل وضد الرجولية فرد وقت...

فهمي إشاعة... لا وجود له... فهمي تعلّة باش نقولو أنّو الإنسان العربي قابل ل اللتعددية، ل الإنشقاق، ل المعارضة، ل الخلاف، ل التعقيد... فهمي وحدو في تونس لكن فمّة المئات من أمثالو في العالم... فهمي البلطي كمبدأ وفكرة ما يمتلكش ذاتو... هو فكرة ترفرف في الريح، أيْ واحد ينجّم يشدها ويستولى عليها...

كريم عبد الكريم.